అనుభూతి

ఎప్పుడో ఎక్కడో ,
పోగొట్టుకున్న ,
'నన్ను'
ఈ కాగితాల్లోనే రోజూ,
వెతుకుతూ ఉంటాను...

అనంతాలలో పారేసుకున్న,
అనుభూతుల వెచ్చదనాన్ని,
ఈ కాగితాల్లోనే దాచుకుని,
నిత్యం తడుముతూ ఉంటాను....

ఎన్నో ఆశలు,
ఎన్నో ఆశయాలు
ఎన్నో ఆదర్శాల ఆవేశాలు
ఈ కాగితాల్లోనే
రెప రెపలాడాయి.....

ఎన్నో కలలు కన్నీరై
ఎన్నో ప్రేమలు స్మృతిగీతాలై
ఈ కాగితాల్లోనే ఇంకుచుక్కలై ఇంకిపోయాయి.....

రాయాలని ఉన్న రాయలేక
రాయకుండా వుండలేక,
పూటపూటకి ,
ఎన్నోపురిటి నెప్పులు...
ఈకాగితాల్లోనే ,
పూర్తికాకుండా ,
నిలిచిపోయాయి....

కలకాలం నిలువలేక,
కలిసి నాతో రాలేక,
కదిలిపోయిన,
వసంతాలెన్నో,
ఈ కాగితాల్లోనే ,
పూలరెక్కలయి ,
మిగిలి పోయాయి....

ఎప్పుడో ఎక్కడో
పోగొట్టుకున్న 'నన్ను'
ఈ కాగితాల్లోనే రోజూ
వెతుకుతూ ఉంటాను.

అందుకే ఎదలోని ,
ఎగిసే భావోద్గ్వేగాన్ని,
అక్షర రూపంలో ,
ఈ కాగితాల్లో ,
పేరుస్తూ ఉంటాను....

రేణుక సుసర్ల