తెల్ల కాగితాలు

గాలికి రెప రెప 
లాడుతూ
తెల్ల కాగితాలు 
నన్ను చూసి 
పలకరింపుగా నవ్వాయి..

నా గురించి
ఏమైనా రాస్తావా
అని అడిగాయి..
సరే మొదటి పేజీ
నీకే ఇచ్చేస్తా అన్నాను..
ఇంతకీ ఈ రోజు
నా పరచిన మనసుపై
నీ భావాక్షరాలు
ఎలా పేరుస్తావు
అని అడిగింది
ఖాళీ కాగితం..

ఏముంది
నా మనసుకి
పట్టిన చెమట
అక్షర రూపంలో పేర్చి
నీ మీద అర్ధంకాని
మరకలుగా
మిగిలిపోతా అన్నాను..
అవును మరి
అవి కన్నీటి చుక్కలని
తెలియ కూడదుగా
అంది కాగితం...

అవును నీకు తప్ప
ఎవరికి చెప్పలేను కదా..
ఒంటరిగా ఉన్నప్పుడల్లా
నువ్వే గా నా నేస్తానివి..
అని కృతజ్ఞతతో..
నిమిరాను
తెల్ల కాగితాలని..

రేణుక సుసర్ల